Алтынньы 9 күнүгэр Бүлүү улууһун Кыадаҥда нэһилиэгин олохтооҕо, Саха АССР Үрдүкү Сэбиэтин Президиумун Бочуоттаах грамотатынан үс төгүл наҕараадаламмыт, элбэх оҕолоох ийэ, эбэ, хос эбэ Анна Егоровна Игнатьева төрөөбүтэ 100 сылыгар аналлаах тэрээһин Кыадаҥда сиригэр-уотугар буолан ааста.
Кини олорбут дьиэтин таһыгар, Күндэтин үрдүгэр, өйдөбүнньүк дуоска аһылынна. Манна оҕолоро, сиэннэрэ, чугас дьоно, нэһилиэк олохтоохторо, Бүлүүттэн улуус баһылыгын бастакы солбуйааччыта Иван Евсеев, улуус киин бибилэтиэкэтин кылаабынай бибилэтиэкэрэ Луиза Кононова кэлэн ыалдьыттаатылар.
Тэрээһин иккис чааһыгар Кыадаҥда сынньалаҥ киинигэр Анна Егоровна оҕолоро уонна сиэнэ Людмила Горохова хомуйан, таҥан таһаарбыт “Олох дьоло - үлэҕэ. Ийэ дьоло - оҕоҕо" кинигэ сүрэхтэниитэ буолла. Төгүрүк остуол тула олорон, оҕолоро, чугас дьоно ийэлэрин туһунан ахтан-санаан аастылар. Уолаттар ийэлэрин кытаанах ирдэбилинэн оҕо эрдэхтэриттэн үлэҕэ сыстыбыттарын, үөрэхтээх, идэлээх дьон буоларга дьулуспуттарын ийэлэрин аатыгар сүгүрүйэн туран истиҥ тылларынан бэлиэтээтилэр, махтаналларын эттилэр.
Нэһилиэк ытык саастаах олохтоохторугар, Анна Егоровна үөлээннээхтэригэр, Ольга Дмитриевна Томскаяҕа, Диамид Гаврильевич Томскайга өйдөбүнньүк бэлэхтэри туттардылар. Маны таһынан, Кыадаҥда оскуолатын туйгун үөрэхтээх, ситиһиилээх үөрэнээччилэригэр Анна Егоровна Игнатьева аатынан стипендияны олохтоон, оскуола дириэктэригэр Варвара Николаевна Томскаяҕа туттардылар.
"Анна Егоровна ыал улахан оҕото буолан, сэриигэ барбыт убайын оннугар хаалан, эр киһилии ыарахан үлэҕэ сылдьыбыт. Оччотооҕу олох ыараханын дьарамай санныгар сүкпүт, үлэттэн өлбүт киһи суох диэн санаанан салайтарар, туппутун ыһыктыбат туруу үлэһит этэ. Ол холобуругар алта оҕотун үлэнэн иитэн, атахтарыгар туруорбута, киһи-хара гыммыта, үөрэхтээх дьон буолалларыгар олук уурбута. Күн күбэй ийэ сырдык аатыгар сүгүрүйэбит", - диэн нэһилиэк олохтоохторо санааларын үллэһиннилэр.
