Алтынньы 7 күнүгэр Национальнай бибилэтиэкэ Историческай саалатыгар руна (уурунуу) суругу үөрэппит-чинчийбит, историк, уопсастыбаннай диэйэтэл Андрей Кривошапкин-Айыҥа төрөөбүтэ 76 сылыгар аналлаах “Ытык таҥара таҥараһыта буоламмын...” диэн кэмпириэнсийэ ыытылынна. Тэрээһиҥҥэ “Силис” уопсастыбаннай тэрилтэ чилиэннэрэ, “Саха итэҕэлэ” бөлөх бэрэстэбиитэллэрэ, Айыҥа үлэлэрин сэргээччилэр муһуннулар.
Андрей Иванович саха норуотун духуобунай баайын үөрэтиигэ сүҥкэн кылаатын киллэрбит киһи. Философия, итэҕэл уонна этнография үлэлэрин дириҥник ырытан, саха төрүт итэҕэлин сөргүтээччи, тарҕатааччы быһыытынан элбэх киһи истибит, билэр буолуохтаах. Айыҥа чинчийиилэригэр руна суруга биир ураты миэстэни ылар. Үлэлэригэр түҥ былыргы түүр тылларын арҕааҥҥы уонна илиҥҥи диалектарын биир тэҥник ааҕар быраабылалары оҥорбута.
Кэмпириэнсийэҕэ 100-тэн тахса киһи кэлэн, история, култуура уонна саха духуобунай баайын туһунан дакылааттары иһиттилэр.
“Тэрээһин кыттыылаахтара дьон-сэргэ интэриэһин тартылар. Айыҥа үлэтин билэр, истэр, сонургуур дьон үгүс эбит диэн түмүккэ кэллибит. Сэргиир, бу эйгэҕэ үлэлиир дьон билиилэрэ-көрүүлэрэ киэҥэ, үрдүк таһымнааҕа көстөр”, - диэн “Силис” уопсастыбаннай тэрилтэ салайааччыта Кирилл Софронов бэлиэтээтэ.
Национальнай бибилэтиэкэ үлэһиттэрэ Андрей Кривошапкин үлэлэринэн кинигэ быыстапкатын туруоран, тэрээһини ситэрэн-хоторон биэрдилэр.
