Балаҕан ыйын 10 күнүгэр СӨ Национальнай бибилэтиэкэтин Историческай саалатыгар Василий Илларионов, Туяра Илларионова, Елена Николаевна хомуйан оҥорбут "Г.Е. Федоров: фольклору хомуйааччы уонна кыраайы үөрэтээччи" диэн саҥа кинигэлэрин сүрэхтэниитэ буолан ааста.
Кинигэ Cунтаар улууһугар киэҥник биллэр фольклорист-хомуйааччы Георгий Евгеньевич Федоров - Сэһэн Дьөгүөр төрөөбүтэ 115 сылыгар анаммыт.
Георгий Евгеньевич Федоров 1959 сылтан этнографиянан, археологиянан дьарыктаммыта. 14 төгүл археологическай экспедицияҕа сылдьыhан 80 араас көмүктэри арыйсыбыта. Фольклорист быһыытынан профессор Ф.Г. Сафоновтыын, фольклорист Н.В. Емельяновтыын, этнографтар С.И. Николаев-Сомоҕоттолуун, А.И. Гоголевтыын, А. А. Поповтуун, Н.Д. Архиповтыын, фольклорист – этнограф К. Д. Уткинныын элбэхтэ бииргэ үлэлээбитэ.
Сэһэн Дьөгүөр улуус уонна өрөспүүбүлүкэ хаһыаттарыгар дойдутун былыргытын: устуоруйатын, оччотооҕу дьон олоҕун-дьаһаҕын туһунан суруйбут кылгас ыстатыйалара, археологическай экспедицияларга сылдьыбыт бэлиэтээһиннэрэ уонна онтон да атын араас матырыйаал түмүллэн кинигэ буолан күн сирин көрбүт.
Тэрээһин филология билимин дуоктара, бэрэпиэссэр Василий Илларионов киирии тылынан саҕаланна. Кинигэ тула санааларын үллэһиннилэр: СӨ култууратын уонну духуобунай сайдыытын миниистирин солбуйааччыта Мария Турантаева, суруйааччы, суруналыыс Иван Николаев-Уххан, Георгий Федоровтыын элбэхтэ алтыспыт биир дойдулаахтара Егор Контогоров, Наталья Тимофеева.
Педагогика билимин дуоктара, бэрэпиэссэр Наталья Поликарпова: “Мин ханнык баҕарар үлэни педагогика өттүнэн көрөр идэлээхпин. Георгий Евгеньевич тыла-өһө - тыыннаах саха тыла, кини бэлиэтээһиннэригэр, ыстатыйаларыгар, сурунан хаалбыт үһүйээннэригэр саха мындыра, сиэрэ-туома бүтүннүү оҕуруо курдук тиһиллэн сылдьар эбит диэн бэлиэтээн көрдум. Бу үлэлэрин биһиги, кыраайы үөрэтиигэ эрэ буолбакка, оҕо иитиитигэр эмиэ туттуохпутун сөп эбит. Маннык чаҕылхай киһи үлэлэрин сыа-сым курдук хомуйан таһаарбыттара кэнэҕэски ыччакка олус үчүгэй бэлэх буолар”, - диэн санаатын үллэһиннэ.
Кинигэ биһирэмин ХИФУ устудьуоннара хомус дьүрүһүйэр тыаһынан, олоҥхонон киэргэттилэр.
Тэрээһиҥҥэ анаан Национальнай бибилэтиэкэ кыраайы үөрэтэр пуонда салаата филология билимин дуоктара, бэрэпиэссэр Василий Илларионов чинчийэр үлэтигэр аналлаах кинигэ быыстапкатын туруорбутун дьон сэҥээрэ көрдө.
