Нам улууһун Хатырык нэһилиэгин Мария Алексеевна Охлопкова аатынан модельнай бибилэтиэкэ бу дьыл сэтинньи ыйыгар үбүлүөйдээх сылын бэлиэтээри бэлэмнэнэр.
Өрөгөйдөөх күн үүнүө 95 күн иннинэ бибилэтиэкэ үлэтигэр сыһыаннаах 95 ТҮГЭН туһунан күн аайы таһааран саҕалыырын туһунан сайтарыгар биллэрбиттэр.
Ол курдук, 95 хонугунан сэтинньи 15 күнүгэр Нам улууһун уонна Хатырык нэһилиэгин ытык киһитэ, Нам улууһугар култуура үлэһиттэриттэн аан бастакынан Саха АССР култууратын үтүөлээх үлэһитэ үрдүк аат иҥэриллибит, Саха Өрөспүүбүлүкэтин култууратын 3 сийиэһигэр делегатынан талыллан кыттыбыт, РФ култууратын туйгуна, Нам улууһун уонна Саха АССР култууратын бочуотун кинигэтигэр киирбит, таайа Максим Кирович Аммосов аатын үйэтитиигэ сүдү кылаатын киллэрбит, Саха Өрөспүүбүлүкэтин Судаарыстыбаннаһын историятын түмэлин Хатырыкка төрүттээбит, нэһилиэк Сэбиэтин 5 төгүллээх дьокутаатынан талыллан үлэлээбит, төрөөбүт-үөскээбит Хатырыга сайдарыгар ахсаана суох элбэх үтүөнү оҥорбут Мария Алексеевна Охлопкова – төрөөбүтэ 95 сылын туолар.
Оруобуна 95 сыл анараа өттүгэр Хатырыкка бастакы ааҕар балаҕан аһыллыбыт. Элбэх кинигэҕэ, ахтыыларга да ахтылларынан, аан бастакы ааҕар балаҕан аһыллыытыгар олук уурбут киһинэн Максим Кирович Аммосов буолар.
1931 сыллаахха «Кэһэр» колхуос комсомолларыгар анаан Максим Аммосов ыыппыт 20 кинигэтинэн ыччат дьон мустар сиригэр ааҕар балаҕан тэриллибит. Бастакы ааҕар балаҕан үлэһитэ суох быһыылаах. Ол туһунан ханна да сурук хаалбатах. Бу 20 кинигэ кэлбитин туһунан ахтыы оччотооҕу комсомолец Роман Кутуков ахтыытыгар баар. Комсомоллар ким баарынан уларса сылдьан аахпыт буолуохтарын сөп. Онтон 1940 сыллаахха 252 кинигэ пуондалаах туһунан ааҕар балаҕан дьэ аһыллар.
