СӨ Национальнай бибилэтиэкэтин кыраайы үөрэтэр национальнай пуонда салаата Михаил Ефимович Николаев сырдык кэриэһигэр аналлаах «Үтүөтэ-өҥөтө умнуллуо, сырдык мөссүөнэ өлбөөдүйүө суоҕа...» диэн кинигэ быыстапкатын туруорда.
Михаил Николаев норуотугар, кэнчээри ыччатыгар анаан суруйан хаалларбыт санааларын, кини өркөн өйүнэн, сатабыллаах салалтатынан үлэҕэ киирбит бырайыактарын, дойдутун, норуотун сайдыытыгар үлэлээбит сылларын кэрэһэлиир кинигэлэри суруйан хаалларбыта биһиги норуоппут бараммат баайа, кэнэҕэски ыччакка утары уунар бэлэҕэ буолар. 
Холобур, быыстапкаҕа «Дети Азии: Длинный путь от истоков» норуоттар икки ардыларынааҕы оонньуулар хайдах кыым саҕа санааттан сайдан, аан дойду таһымыгар тахсыбытын туһунан, «Возвращенные имена» диэн репрессия кырыктаах суорунатыгар түбэспит саха норуотун чулуу дьонун албан ааттарын төнүннэриигэ үлэлэспит үлэтин туһунан, саха норуотун сүдү дьонугар - Максим Аммосовка, Өксөкүлээх Өлөксөйгө - анаабыт кинигэлэрин кытта билсиэххитин сөп.
Маны таһынан, экономика билимин доктора, суруйааччы Василий Дарбасов, социология билимин доктора Ульяна Винокурова, саха норуодунай суруйааччыта Василий Егоров-Тумарча араас сылларга Михаил Ефимовичка анаан суруйбут кинигэлэрэ быыстапкаҕа турдулар. Кинигэ быыстапкатын кэлэн сэргээҥ диэн ыҥырабыт.
Михаил Ефимович Николаев суруйан хаалларбыт үлэлэрин, кини олоҕун, үлэтин туһунан сырдатар кинигэлэри биһиги электроннай бибиэлитэкэбит нөҥүө бу сигэнэн киирэн тэйиччиттэн ааҕыаххытын сөп.
