От ыйын 30 күнүгэр СӨ Национальнай библиотекатын Историческай саалатыгар боксаҕа Саха Республикатын үтүөлээх тренера, Хаҥалас улууһун I Дьөппөн нэһилиэгин бочуоттааах олохтооҕо, Россия үлэтин ветерана, Саха Республикатын, Илин уһук федеральнай уокурук боксаҕа хас да төгүллээх чемпиона, призера, Россияҕа физкультура уонна спорт сайдыытын иһин анал бэлиэ хаһаайына, үгүс ыччаты спорт кэрэ эйгэтигэ сирдээбит Иван Романович Кривогорницын сырдык олоҕун, үлэтин-хамнаһын туһунан билиһиннэрэр «Кылаан киһи» диэн саҥа кинигэ сүрэхтэннэ.
Кинигэни Саха сиригэр бокса төрүттэммитэ 70 сылыгар анаатылар. Тэрээһини кинигэни үбүлээн таһааттарбыт Иван Романович олоҕун аргыһа Галина Гаврильевна Кривогорницына уонна хомуйан-таҥан оҥорбут Татьяна Петрова-Мойуу Кыыһа иилээн-саҕалаан ыыттылар.
Кинигэ тоҕус түһүмэхтэн турар, манна Иван Романович чугас дьоннорун, боксаҕа уһуйбут оҕолорун, бииргэ алтыһан, үлэлээн ааспыт коллегаларын, үөлээннээхтэрин истиҥ-иһирэх ахтыылара, араас сылларга олохтоох хаһыакка бэчээттэммит бокса күрэҕин сырдатар ыстатыйалар киирбиттэр. Кинигэҕэ Иван Романович тус архыыбыттан үгүс хаартыскалара уонна кыайыы үктэлин аҕалбыт наҕараадалара кичэллээхтик үйэтитиллэн киирбиттэрэ кэрэхсэбиллээх.
Тэрээһиҥҥэ Иван Романович чугас дьоно, бииргэ үөрэммит доҕотторо, спортка уһуйуллубут иитиллээччилэрэ уонна үөлээннээхтэрэ кэлэн доҕордорун ахтан-санаан, кинигэттэн астынан эҕэрдэ бастыҥын этэн дуоһуйан тарҕастылар.
