СӨ Национальнай бибилэтиэкэтин кыраайы үөрэтэр национальнай пуонда салаата П.А.Ойуунускай аатынан литература түмэлигэр саха биллэр-көстөр суруйааччыларыгар Рафаэль Баҕатаайыскайга уонна Семен Капитоновка аналлаах кинигэ быыстапкаларын тэрийэн туруордулар.
СӨ норуодунай суруйааччыта Рафаэль Баҕатаайыскай төрөөбүтэ 95 сылын көрсө П.А.Ойуунускай аатынан литература түмэлигэр үбүлүөйдээх тэрээһин ыытылынна. Тэрээһиҥҥэ түмэл үлэһиттэрэ, суруйааччылар, билим үлэһиттэрэ, биир дойдулаахтара тоҕуоруһа түмсэн Рафаэль Баҕатаайыскайы ахтан-санаан аастылар, айымньыларын тула сэһэргэстилэр, киэҥ кэпсэтиини тэрийдилэр.
Бу тэрээһиҥҥэ СӨ Национальнай бибилэтиэкэтин кыраайы үөрэтэр национальнай пуонда салаатын сэбиэдиссэйэ Лариса Кычкина Рафаэль Баҕатаайыскай олоҕун, айар үлэтин сырдатар кинигэ быыстапкатын бэлэмнээн туруорда.
Быыстапка суруйааччы айымньыларыттан саҕаланар. Манна кини поэт, сатирик, прозаик, оҕо суруйааччыта, драматург буолан арыллар. Рафаэль Баҕатаайыскай айымньыларын тылбаастара быыстапкаҕа сүрүн миэстэни ыллылар. Кини хоһоонноро саха ырыатын историятыгар ураты суолталаахтар, ол туһунан бу быыстапка сиһилии кэпсээтэ. Саха норуотун хоһоонньута тус олоҕун сырдатар кинигэлэр, бэчээккэ тахсыылар, суруйуулар, бэлиэтээһиннэр, ырытыылар ыалдьыттар болҕомтолорун тартылар.
Маны таһынан, саха суруйааччыта, лирик поэт Семен Капитонов 75 сааһыгар аналлаах «Күннээх Амма уран тыллааҕа» диэн кинигэ быыстапката П.А. Ойуунускай аатынан литература түмэлигэр турда. Быыстапкаҕа лирик поэт айар үлэтэ, тус олоҕо сырдатылынна. Сүрэхтэн тахсар истиҥ тыллардаах хоһоонньут Семен Капитонов сахалыы сэмэй олоҕун, уран тылын туһунан быыстапка дьон-сэргэ болҕомтотун тарта.
Екатерина Попова,
СӨ Национальнай бибилэтиэкэтин
Кыраайы үөрэтэр национальнай
пуонда салаатын бибилэтиэкэрэ
