Өрөспүүбүлүкэ бибилэтиэкэлэригэр оҕо төрөөбүт тылынан ааҕыытын көҕүлүүр кииннэр тэриллэн үлэлэрин саҕалаатылар. Бу үлэ ааспыт сыл ахсынньытыгар ыытыллыбыт СӨ бибилэтиэкэрдэрин бастакы сийиэстэригэр Ил Дархан Айсен Сергеевич Николаев сорудаҕынан СӨ Бырабыыталыстыбатын бэрэссэдээтэлин солбуйааччыта Сергей Местников көҕүлээһининэн саҕаламмыта. Маннык Киин оҕо төрөөбүт тылынан ааҕар интэриэһин уһугуннарар, саха литэрэтиирэтин уһулуччу айымньыларын билиһиннэрэр, ааҕыы култууратын оҕоҕо иҥэрэр сыаллаах-соруктаах тэриллэр.
Билигин СӨ култуура уонна духуобунай сайдыыга министиэристибэтин көҕүлээһининэн кииннэр ситимнэрин олохтуур үлэ бара турар. Ол курдук, 2026 сыл ыам ыйын көрдөрүүтүнэн, өрөспүүбүлүкэ үрдүнэн 324 киин 32 улууска уонна Дьокуускай куоракка аһыллан үлэлэрин саҕалаатылар. Мантан 5 киин эбээн, эбэнки тылынан ааҕыыга Алдан, Өймөкөөн, Булуҥ, Кэбээйи улуустарыгар арылыннылар. Ол курдук, бу арыллыбыт кииннэр саха тылын эрэ буолбакка, хотугу аҕыйах ахсааннаах норуоттар тылларын үөрэтиигэ улахан болҕомтону эмиэ ууруохтара.
Бу улахан бырайыагы СӨ Национальнай бибилэтиэкэтин дириэктэрин солбуйааччыта Светлана Попова уонна Оҕо ааҕар, сайдар, аһыллар киинин үлэһитэ Константин Неустроев иилээн-саҕалаан, салайан ыыталлар.
Саха Өрөспүүблүкэтин култуура уонна духуобунай сайдыыга миниистирэ Афанасий Иванович Ноев: “Саха сирин бибилэтиэкэлэригэр, Ил Дархан Айсен Николаев соругунан, оҕо төрөөбүт тылынан ааҕыытын көҕүлүүр кииннэр тэриллэн үлэлииллэр. Бу аhыллыбыт кииннэр саха тылын эрэ буолбакка, хотугу аҕыйах ахсааннаах норуоттар тылларын үөрэтиигэ улахан болҕомтону эмиэ ууруохтара. Оҕо төрөөбүт тылынан ааҕар интэриэһин уһугуннарар, саха литэрэтиирэтин уһулуччу айымньыларын билиһиннэрэр, ааҕыы култууратын оҕоҕо иҥэрэр сыаллаах-соруктаах тэриллэр кииннэр үлэлэрэ ситиһиилээх, үтүө түмүктээх буолуо диэн эрэнэбин”
Саха Өрөспүүблүкэтин Национальнай бибилэтиэкэтин Оҕо ааҕар уонна сайдар киинин үлэһитэ Константин Константинович Неустроев: “Быйыл Сахабыт сиригэр Култуура сылыгар, ону тэҥэ дойдубутугар Норуоттар доҕордоһууларын сылыгар бу Оҕо төрөөбүт тылынан ааҕар кииннэрэ арыллаллара олус улахан суолталаах уонна эппиэтинэстээх. Бу аһыллыбыт кииннэр, биһиги, кэлэр көлүөнэ ыччаттарбыт төрөөбүт тылларын, култуураларын умнубат туһугар, харыстыыр сыаллаахтар-соруктаахтар. Биһиги сыалбыт – оҕолору кыра эрдэхтэриттэн ааҕыы култууратыгар угуйуу, Улуу суруйааччыларбыт айымньыларын үйэтитии, төрөөбүт тылларыгар тапталы, харыстабыллаах сыһыаны иҥэрии буолар. Аһыллыбыт кииннэр үлэлэрин өйөөҥҥүт, кинилэр тэрээһиннэригэр көхтөөх кыттыыны ыларгытыгар ыҥырабын”.
Аһыллыбыт кииннэр номнуо тэрээһииннэрин ыытан, кыттан саҕалаатылар, ол курдук: быйыл Х төгүлүн ыытыллар «Символы Якутии. Я – патриот» өрөспүүбүлүкэтээҕи олимпиадаҕа өрөспүүлүкэбит бары муннуктарыттан быһа холоон 11 тыһ. тахса оҕо кыттыыны ыллылар. «Арктик Бук Фест» Арассыыйа регионнарын икки ардыларынааҕы бэстибээлигэр эмиэ кыттыыны ыллылар. Мииринэйгэ «Ийэ тыл түһүлгэтэ» төгүрүк остуол, төрөөбүт тылынан ааҕыы күрэхтэрэ ыытылынныллар. Таатта улууһугар Чычымахтааҕы бибилэтиэкэ «Тоҕус төгүл тоҕону ааҕабыт», Уус Алдаҥҥа «Өйүөххэ, өрүһүйүөххэ Ийэ тылбытын» бырайыактары көмүскүүр тэрээһин, Сунтаарга «Дьиэ кэргэн – биир сомоҕо», Мэҥэ Хаҥалас улууһугар “Ийэм аҕам уонна мин – ааҕар дьиэ кэргэн” күрэх, Аллайыахаҕа “Төрөөбүт тылым” ааҕыы челленджа, Өймөкөөҥҥө «Оҕо саас остуоруйата» ааҕыы уо.д.а. араас хабааннаах тэрээһиннэр аһыллыбыт кииннэргэ ыытылыннылар. Ону тэҕэ Алдаҥҥа «Балдыдяк эведы Турэнми» эбэнки тылын үөрэтии кулууба үлэтин саҕалаата.
Санатан эттэххэ, олунньу 13 күнүгэр, Төрөөбүт тыл, сурук-бичик күнүн бэлиэтиир үөрүүлээх тэрээһинигэр СӨ бырабыыталыстыбатын бэрэссэдээтэлин солбуйааччыта Сергей Местников «Оҕо төрөөбүт тылынан ааҕыытын тарҕатар бастыҥ киин» өрөспүүбүлүкэтээҕи күрэҕи биллэрбитэ. Күрэх төрөөбүт тылы харыстыыр уонна сайыннарар судаарыстыбаннай бырагыраама чэрчитинэн ыытыллар, уопсай бириис пуондатыгар 5 мөлүйүөн харчы көрүллэр, күрэх олунньу ыйтан сэтинньигэ диэри ыытыллар.
Константин Неустроев, Оҕо ааҕар, сайдар киинин "Детская точка кипения" салаа сэбиэдиссэйэ
