Ыам ыйын 7 күнүгэр СӨ Национальнай бибилэтиэкэ Кыраайы үөрэтэр пуонда салаатын ааҕар саалатыгар бэрт сэргэх түгэн тосхойдо. Ол курдук СӨ норуодунай уонна РФ үтүөлээх худуоһунньуга Юрий Спиридонов уонна Кыраайы үөрэтэр пуонда салаата “Саха ойуулуур-дьүһүннүүр ускуустубата” диэн холбоһуктаах бырайыактарын чэрчитинэн “Тридент» клиника тиис оҥорор лаборатория салайааччыта, мэдэсиинэ идэлээх худуоһунньук Сардана Чичирбынова «Восстановление утраченных связей» диэн хартыыналарын быыстапкатын түмүктүүр күнэ буолан ааста.
Аныгы саха ускуустубатыгар ураты суоллаах-иистээх быыстапка дьон-сэргэ, ааҕааччы болҕомтотун тарта. Үлэлэр худуоһунньук үрдүк профессионализмын туоһулууллар уонна саха култууратын киэҥ эйгэтин баай кылаатынан буолаллар.
Бу күн СӨ норуодунай уонна РФ үтүөлээх артыыһа Дмитрий Артемьев кэлэн бэйэтин ырыатын уонна алгыһын тиэртэ.
Национальнай бибилэтиэкэ дириэктэрин солбуйааччы Светлана Попова быыстапканы сөҕөн-махтайан туран бибилэтиэкэ салалтатын аатыттан махтал суруктары Юрий Спиридоновка уонна Сардана Чичирбыноваҕа туттарда.
Тэрээһин ыалдьыттара филологическай наука доктора, ХИФУ Хотугу норуоттар тылларын уонна култуураларын үнүстүтүүтүн Культурология хаапыдыратын сэбиэдиссэйэ Людмила Ефимова, ыраах Турция Анкара университетын аспирана, М.К.Аммосов аатынан ХИФУ истээччитэ Хүлйа Челиктенйылдыз быыстапка туһунан санааларын сайа эттилэр. Кэлбит дьон-сэргэ бэйэлэрин баҕа санааларын дьоро күн сүрүн дьоруойугар тиэртилэр, айар үлэтигэр ситиһиилэри баҕардылар. Бу тэрээһини Кыраайы үөрэтэр пуонда салаатын сэбиэдиссэйэ, СӨ култууратын туйгуна Л.И.Кычкина иилээн-саҕалаан үрдүк таһымҥа ыытта.
