Норуот сурунаала «Чолбон» муус устар ыйынааҕы нүөмэрин билиһиннэрэбит:
Сурунаал бас эрэдээктэринэн үлэлээбит норуот суруйааччыта В.С. Яковлев–Далан «“Чолбон” – сарсыардааҥҥы сулус» ыстатыйата;
Суруйааччы, суруналыыс Василий Титов төрөөбүтэ 85 сылын көрсө оҕо сааһын сайылыгын уонна саха харсыык оҕустарын туһунан «Эбиэннээх» кэпсээнэ;
Чучунаа оҕотун ииппит булчут туһунан Федор Павлов «Чууча» кэпсээнэ;
Сиэн Чолбодук «хара сир устун саас маҥнай...» диэн тыллартан саҕаланар бар дьонун тапталын ылбыт ырыа тылын ааптарын быһыытынан биллэр. Поэт «Билигин да саас ахсын ньургуһун муҥутуур дьоллуур...» диэн хоһооннорун бөлөҕө;
Поэт Александр Тарасов Саха Өрөспүүбүлүкэтигэр Культура сылыгар анаабыт «Омук быһыытынан олоххо ордук уратыбыт олоҥхо...» хоһооннорун бөлөҕө;
Арылы Дуйдаах «Сахалыы саҥалаах дойдубар» диэн саҥа хоһооннорун бөлөҕө;
Прозаик Дайыына кыра кылаас оҕолоругар аналлаах «Балыктар дуу, баҕалар дуу?» «Чоппуускалар уонна кус оҕолоро», «Күндү барыанньа» кэпсээннэрэ;
Алтай Өрөспүүбүлүкэтин норуотун суруйааччыта Дибаш Каинчин таарбаҕаннар нөҥүө кыра омук дьылҕатын ойуулур «Саратан» кэпсээнэ Лилия Иванова, Данил Макеев тылбаастарыгар;
«Олоҥхо дойдутун айар түмсүүлэрэ» рубрикаҕа Хаҥалас улууһунааҕы «Өлүөнэ долгуннара» – АйКыыма «Ыстапаан» сэһэниттэн быһа тардыы, Лариса Атласова, Уокка Куо, Саргылана Сайын хоһоонноро;
СӨ искусствотын үтүөлээх деятелэ, прозаик, драматург, поэт олоҕун туһунан Рустам Каженкин «Сиэн Чолбодук. Хара сир устун литератураҕа» ыстатыйата;
Прозаик Ангелина Васильева-Дайыына айар үлэтигэр литературоведтар уонна суруйааччылар бэлиэтээһиннэрэ;
«Билии түһүлгэтэ» рубрикаҕа учуонайдар А.Н. Федоров, А.Ф. Жирков, П.Я. Константинов, В.А. Новоприезжая «Климат сылыйыыта Илин Эҥэргэ ирбэт тоҥ ландшафтарыгар дьайыыта» ыстатыйа нөҥүө ирбэт тоҥу харыстааһын уонна алдьаннаҕына чөлүгэр түһэриини туһунан чинчийиилэрин билиһиннэрэллэр;
«Кахкаа көтөр» диэн таджик остуоруйата С.М.Охлопкова тылбааһыгар.
Күндү ааҕааччы, «Чолбон» сурунаал саҥа нүөмэрин ааҕыҥ, сэргээҥ.
