Бүгүн, муус устар 8 күнүгэр, СӨ Национальнай бибилэтиэкэтин историческай саалатыгар сотору кэминэн Саха театрын сыанатыгар сүрэхтэниэхтээх «Көнө суолтан туораабакка» диэн саҥа туруорууну ырытыы буолла. Бу испэктээкил Саха сирин биллиилээх судаарыстыбаннай диэйэтэлэ Гавриил Иосифович Чиряев сырдык кэриэһигэр ананыаҕа.
Кэпсэтиигэ пьеса ааптара Наталья Харлампьева Гавриил Чиряев уобараһын дьиҥнээхтик көрдөрөр сорук турбутун кэпсээтэ. Киниэхэ Гавриил Иосифович кыыһа Наталья Чиряева бэлэмнээбит архыып матырыйааллара улахан көмө буолбуттарын эттэ, үлэтин бүтэһик сылларыгар кинилиин бииргэ үлэлэспитин иһитиннэрдэ.
Мунньахха Бүлүү улууһун дэлэгээссийэтэ, архыып үлэһиттэрэ, Саха театрын артыыстара уонна суруналыыстар кытыннылар. Кинилэр улуу салайааччы аатын үйэтитиигэ маннык дьоһун туруоруу суолтатын бэлиэтээн, Саха театрын айар бөлөҕөр махталларын биллэрдилэр.
Премьера: муус устар 18 уонна 19 күннэригэр киэһэ 17:00 чаастан.
Саха тыыйатырын пресс-киинэ