Бүгүн олоҥхоһут, норуот ырыаһыта, тойуксут, бастыҥ туруу үлэһит, култуура үтүөлээх үлэһитэ, ССРС суруйааччыларын сойууһун чилиэнэ Прокопий Ядрихинскай-Бэдьээлэ төрөөбүтэ 125 сыла.
Кини тута хоһуйааччы быһыытынан ыллаан-туойан хаалларбыт «Тараҕана сайылык» айымньыта саха литэрэтиирэтин хрестоматиятыгар бигэтик киирэн, хас да көлүөнэ саха ыччатын өйүгэр хатаммыта, уус-уран тыл дэгэттээх умсулҕаныгар уһуйбута. Маны сэргэ, «Ходуһа уһуктуута» (1964), «Олоххо айхал» (1971) уо.д.а тойуктара бэчээккэ тахсыбыттара.
Прокопий Ядрихинскай олоҥхоһут быһыытынан «Дьырыбына Дьырылыатта Кыыс бухатыыр» уонна «Күн Дьөһүөлдьүн» айымньыларын суруйтаран хаалларбыта радио пуондатыгар харалла сытар.
Кини тыыннаах куолаһыттан суруллубут олоҥхотун фольклорист Петр Дмитриев анаан устан, кэлин «Дьырыбына Дьырылыатта Кыыс бухатыырын» (1981) бэчээккэ бэлэмнээн таһаартарбыта. Кэлин Прокопий Ядрихинскай-Бэдьээлэ «Дьырыбына Дьырылыатта Кыыс бухатыыр» олоҥхото сахалыы-нууччалыы тылынан академическай таһымнаах кинигэ буолан тахсыбыта (2011).
СӨ Национальнай бибилэтикэтин электроннай кэлиэксийэтигэр Прокопий Ядрихинскай-Бэдьээлэ хас да кинигэтин ааҕыахха сөп, ону таһынан эт куолаһынан толорбут аҕыс ырыата, ол иһигэр «Тараҕана сайылык», «Ньургун трактор», олоҥхо саайтыгар киирэ сылдьаллар.
«Дьырыбына Дьырылыатта Кыыс бухатыыр» олоҥхотун үгүс аныгы толорооччу сөбүлээн үөрэтэр, толорор. Олоҥхоттон быһа тардыыны биир дойдулааҕа, Олоҥхо Ыһыаҕа - 2019 Кылаан кыайыылааҕа Лена Маркова толоруутугар истиҥ.
Варвара Обоюкова, Саха сирин норуоттарын музыкатын уонна фольклорун түмэлин научнай үлэһитин суруйуута туһанылынна.
