Өрөспүүбүлүкэ бибилэтиэкэлэригэр оҕо төрөөбүт тылынан ааҕыытын көҕүлүүр кииннэр тэриллэн эрэллэр. Бу үлэ ааспыт сыл ахсынньытыгар ыытыллыбыт СӨ бибилэтиэкэрдэрин бастакы сийиэстэригэр СӨ Бырабыыталыстыбатын бэрэссэдээтэлин солбуйааччыта Сергей Местников көҕүлээһининэн саҕаламмыта. Маннык Киин оҕо төрөөбүт тылынан ааҕар интэриэһин уһугуннарар, саха литэрэтиирэтин уһулуччу айымньыларын билиһиннэрэр, ааҕыы култууратын оҕоҕо иҥэрэр сыаллаах-соруктаах тэриллэр.
Билигин кииннэр ситимнэрин олохтуур үлэ бара турар. Ол курдук, 2026 сыл кулун тутар ый көрдөрүүтүнэн, өрөспүүбүлүкэ үрдүнэн 63 киин 27 улууска, ол иһигэр Дьокуускай уонна Нерюнгри куораттарга аһыллан үлэтин саҕалаабыт. Бу улахан бырайыагы СӨ Национальнай бибилэтиэкэтин дириэктэрин солбуйааччыта Светлана Попова уонна Оҕо ааҕар, аһыллар киинин үлэһитэ Константин Неустроев иилээн-саҕалаан, салайан ыыталлар.
Соторутааҕыта Абыйдааҕы кииннэммит бибилэтиэкэ систиэмэтигэр Оҕо төрөөбүт тылынан ааҕыытын көҕүлүүр киин аһылынна. Тэрээһиҥҥэ Н.Н. Ефимов аатынан гимназия, В.П. Ефимов аатын сүгэр орто оскуола, Сутуруоха орто оскуолатын үөрэнээччилэрэ, Оҕо ускуустубатын оскуолатын иитиллээччилэрэ уонна учууталлара кытыннылар. Сахалыы таҥнан-симэнэн кэлбит оҕолор ыллаан-туойан, хоһоон ааҕан, саха музыкальнай инструменнарыгар оонньоон көрдөрдүлэр. Тэрээһин уопсай оһуохайынан түмүктэннэ. Сутуруоха орто оскуолатын алын кылааһын үөрэнээччитэ Айтал Слепцов уонна Үрүҥ Хайа гимназиятын үөрэнээччитэ Радмир Прокопьев оһуохайдаан доллоһутан, тэрээһини сэргэхситтилэр.
Тэрийээччилэр этэллэринэн, оҕолор сахалыы остуол оонньууларын ордук сэргээбиттэр, итиэннэ дьэрэкээн уруһуйдаах кинигэлэри көрөн, ааҕан, Кииҥҥэ көтүппэккэ сылдьыах буолан, сүргэлэрэ көтөҕүллэн тарҕаспыттар.
«Төрөөбүт тылбытыгар култуурабыт, мындыр өйбүт, үгэстэрбит иҥэ сылдьалларын тоһоҕолоон туран, Ийэ тыл – норуот дууһата, өбүгэлэри кытта ситимэ уонна инники далаһата буоларын бибилэтиэкэ үлэһиттэрэ Кииммит үлэтин нөҥүө сырдатар, оҕолорго тириэрдэр тустаахпыт. Саҥа тэриллибит Кииммит оҕо болҕомтотун тардан, араас ньымалары тутуһан, үүннүн-сайыннын, саҥа таһымҥа таҕыстын!», - диэн Оҕо төрөөбүт тылынан ааҕыытын көҕүлүүр киин үлэһиттэрэ санааларын үллэһиннилэр.
Олунньу 13 күнүгэр, Төрөөбүт тыл, сурук-бичик күнүн бэлиэтиир үөрүүлээх тэрээһинигэр СӨ бырабыыталыстыбатын бэрэссэдээтэлин солбуйааччыта Сергей Местников «Оҕо төрөөбүт тылынан ааҕыытын тарҕатар бастыҥ киин» өрөспүүбүлүкэтээҕи күрэҕи биллэрбитэ. Күрэх төрөөбүт тылы харыстыыр уонна сайыннарар судаарыстыбаннай бырагыраама чэрчитинэн ыытыллар, уопсай бириис пуондатыгар 5 мөлүйүөн харчы көрүллэр, күрэх олунньу 13 күнүттэн балаҕан ыйын 7 күнүгэр диэри ыытыллар.