Кулун тутар 11-12 күннэригэр Кэбээйигэ Олоҥхо ыһыаҕар аналлаах XVI Өрөспүүбүлүкэ таһымнаах кэмпириэнсийэ ыытыллар.
«Арассыыйаҕа Норуоттар сомоҕолоһууларын, Саха Өрөспүүбүлүкэтигэр Култуура сылынан, Кэбээйи улууһугар ыһыллар Олоҥхо ыһыаҕар бэлэмнэнии чэрчитинэн ыытыллар 16-с өрөспүүбүлүкэтээҕи билим кэмпириэнсийэҕэ мустубут дьон дириҥ билиилэрин, уопуттарын атастаһан, төрүт үгэстэрбитин харыстыырга, көлүөнэттэн көлүөнэҕэ тиэрдэргэ, ыһыаҕы үрдүк таһымҥа ыытарга төһүү күүс буолуохтара диэн эрэнэбин!», - диэн култуура уонна духуобунай сайдыы миниистирэ Афанасий Ноев Max ситимҥэ суруйбута.
Кэмпириэнсийэ маҥнайгы күнүгэр 19 улуустан, Дьокуускай куораттан 1600 тахса киһи мустан, Олоҥхо ыһыаҕын ыытыы научнай-методологическай төрүттэрин дьүүллэһэллэр. Кыттааччылар икки күн устата 10 сиэксийэнэн мунньахха, төгүрүк остуолларга үлэ үөрүйэҕин атастаһыахтара, санааларын үллэстиэхтэрэ. Маны сэргэ сүүрбэттэн тахса сэминээр арааһа уонна маастар-кылаастар ыытыллыахтара.
Кэмпириэнсийэ иитинэн «Кэбээйи түөлбэтин фольклора», «Хомуур олоҥхо» бырайыак биһирэмнэрэ буолуохтара, «Дьулуруйар Ньургун Боотур», «Бүдүрүйбэт Сүһүөхтээх Мүлдьү Бөҕө», «Кыыс Дэбилийэ», «Дьорҕостой Бэргэн» олоҥхо-испэктээктэри көрдөрүөхтэрэ. Маны сэргэ, «Тэлээрис» норуот ансаамбыла муҥха сиэрин-туомун билиһиннэрдэ. Сэбээн Күөл орто оскуолатын 8 кылааһын үөрэнээччитэ Иванна Слепцова олоҥхону эбээн тылынан толордо. Мастаах орто оскуолатын 7 кылааһын үөрэнээччитэ Артем Архипов Ф.С. Семенов — Кырса Сөдүөт «Биэ уола Бэйбэлдьин Тулаайах» олоҥхотуттан быһа тардан ааҕан иһитиннэрдэ. Маны сэргэ, «Олоҥхо эйгэтигэр айан» бэстибээл саҕаланар уонна «Олоҥхо ыһыаҕа» диэн оҕолорго аналлаах оонньуур полигон үлэлиэхтээх. Кэмпириэнсийэ чэрчитинэн норуот маастардарын оҥоһуктара, национальнай таҥас, иһит-хомуос быыстапката турда.
СӨ Ил Дархана Айсен Николаев Олоҥхо күнүгэр, сэтинньи 25 күнүгэр 2025 сыллаахха, олоҥхоҕо, оһуохайга, тимир уустарыгар уонна норуот маастардарыгар истипиэндьийэлэри туттарыы сиэригэр-туомугар Олоҥхо үһүс уон сылын Саха сиригэр ыытар туһунан Дьаһалга илии баттаабыта. Ил Дархан бу сыллар усталарыгар олоҥхону харыстыырга уонна тарҕатыыга, үөрэтии, култуура, куйаар ситимигэр бырайыактары олоххо киллэриигэ, кинигэлэри таһаарыыга улахан үлэ ыытыллыбытын тоһоҕолоон бэлиэтээбитэ.
