Сахалыы уус-уран тыл сүөгэйин-сүмэтин илдьэ сылдьар, санаатын сайа этэр кыахтаах дьону «Аман өс» өрөспүүбүлүкэтээҕи кэтэхтэн күрэххэ кыттаргытыгар ыҥырабыт.
Күрэх сүрүн сыала-соруга - сахалыы тыл-өс олох бары эйгэтигэр туттуллар кыаҕын көрдөрүү, Арассыыйа норуоттарын ытык өйдөбүллэрин тула кэпсэтэр, санаа атастаһар усулуобуйаны тэрийии, тыл этии үөрэҕэр тирэҕирэн, дьону-сэргэни итэҕэтэн, бэйэ санаатын сахалыы сайа этэри көҕүлээһин.
Сүрүн тэрийээччи - Саха Өрөспүүбүлүкэтин Национальнай бибилэтиэкэтин Төрүт олохтоох норуоттарын киинин кыраайы үөрэтэр национальнай пуондата.
Күрэх кэтэхтэн буоларын быһыытынан, кыттааччыттан 5 - 7 мүнүүтэлээх видео-устуу ирдэнэр. Тыл этии тиэмэтин кыттааччы, балаһыанньаҕа ыйыллыбыт өйдөбүллэринэн сирдэтэн, бэйэтэ талар уонна ааттыыр. Тыл этиитин дьүүллүүр сүбэ анал кэриҥинэн сыаналаан кыайыылаахтары быһаарар. Түмүк муус устар ортотугар Национальнай бибилэтиэкэ сайтыгар тахсыаҕа.
Кыттааччы анал сайаапкатын, видеоматырыйаалы 2026 сыл кулун тутар 20 күнүгэр диэри туттарар.