СӨ Национальнай бибилэтиэкэтигэр Ийэ тыл уонна сурук-бичик күнүн чэрчитинэн сахалыы таба суруйуу үөрүйэҕин олохсутар, иҥэрэр сыаллаах «Сахалыы дьыктаан» аахсыйа 12 төгүлүн ыытылынна.
Тэрийэр бөлөх дьыктааны ыытарга сылын ахсын сонун саҥардыылары киллэрэр, ол курдук быйыл Саха сиригэр Култуура сылын чэрчитинэн, дьыктаан тиэкиһин СӨ Култуураҕа уонна духуобунай сайдыыга миниистирэ Афанасий Ноев, Ил Түмэн дьокутаата, А.Д. Макаров аатынан Дьокуускайдааҕы култуура уонна ускуустуба кэллиэһин дириэктэрэ Захар Никитин уонна Олоҥхо тыйаатырын артыыһа, СӨ култууратын туйгуна Дмитрий Хоютанов саха норуодунай суруйааччыта Василий Яковлев-Далан «Кэриэн ымыйа» айымньытыттан «Көмүөл» быһа тардыыны аахтылар.
«30 сыл анараа өттүгэр биһиги маҥнайгы Бэрэсидьиэммит Михаил Николаев ийэ тылбытын харыстыыр, сайыннарар сыаллаах, Семен Новгородов төрөөбүт күнүн суолталаан, онно сөп түбэһиннэрэн, сурук-бичик күнүн уураахтаабыта. Билиҥҥи ыччат бу кэскиллээх дьыала утумнааччылара буолаҕыт, ону өйдөөн бүгүн кэлэн олороргут хайҕабыллаах, кэрэхсэбиллээх буолар» , - диэн тылларынан СӨ Култуураҕа уонна духуобунай сайдыыга миниистирэ Афанасий Ноев тэрээһини үөрүүлээхтик арыйда.
Ил Түмэн дьокутаата, А.Д. Макаров аатынан Дьокуускайдааҕы култуура уонна ускуустуба кэллиэһин дириэктэрэ Захар Никитин аахсыйа 2014 сылтан сылын ахсын тиһигин быспакка ыытыллан, дьон-сэргэ көхтөөхтүк кыттарын бэлиэтээн эттэ. «Ханнык баҕарар омук сайдыытын таһымын көрдөрөр биир бэлиэтэ төрөөбүт тылынан таба суруйуута буолар. Кыттыылаахтарга бука барыгытыгар ситиһиини баҕарабын, бэйэҕит билиигитин, таба суруйуугутун өссө төгүл тургутан көрөн, сыллата чочуйан, сахабыт тылынан сөпкө суруйарга хас биирдиибит дьулуһуоҕуҥ диэн ыҥырабын», - диэн түмүктээтэ.
Тэрийэр бөлөх аахсыйа эрэллээх кыттааччыларын анал бириистэринэн бэлиэтээтэ, ол курдук саамай аҕа саастаах кыттааччыга, 85 саастаах Хатас олохтооҕор Екатерина Григорьевна Белоноговаҕа, Нам улууһугар култуура эйгэтигэр өр сылларга үлэлээбит Ульяна Дмитриевна Сивцеваҕа сэмэй бэлэхтэрин туттардылар.
«Сахалыы дьыктааҥҥа» быйыл уопсайа өрөспүүбүлүкэ үрдүнэн 4404 киһи кытынна, ол курдук 371 кииннэммит бибилэтиэкэлэргэ тэриллэн ыытылынна, 894 кыттааччы «туйгун» сыанаҕа суруйбуттара билиннэ.
Бу улуустар көхтөөхтүк кыттыбыттар:
Чурапчы улууһа – 531 киһиттэн «туйгун» сыанаҕа 74 киһи суруйбут,
Уус Алдан улууһа – 383 кыттааччы, «туйгун» сыана – 41,
Сунтаар улууһа – 294 кыттааччы, «туйгун» сыана – 24,
Мэҥэ Хаҥалас улууһа – 287 кыттааччы, «туйгун» сыана – 80,
Нам улууһа – 273 кыттааччы, «туйгун» сыана – 57,
Дьааҥы улууһа – 261 кыттааччы, «туйгун» сыана – 73,
Дьокуускай куорат кииннээмит бибилэтиэкэтэ – 254, «туйгун» сыана – 29,
Үөһээ Бүлүү улууһа – 208 кыттааччы, «туйгун» сыана – 58.
Оттон СӨ Национальнай бибилэтиэкэтин уораҕайыгар 4 сиринэн арахсан, уопсайа 150 киһи кэриҥэ кытынна. Кинилэр үлэлэрин тэрийэр бөлөх ый иһигэр бэрэбиэркэлээн, Национальнай бибилэтиэкэҕэ тиэрдиэхтэрэ. Хас биирдии кыттааччыга туоһу суруктары туттардылар, оттон бастыҥ үлэлээхтэр Добун суругунан уонна сэмэй бэлэхтэринэн наҕараадаланыахтара.
