«Чолбон» норуот сурунаала 2026 сыл иккис нүөмэригэр ааҕааччыларыгар анаан үгүс умсугутуулаах матырыйаалы бэлэмнээбит.
Ол курдук былыргы дьыллар мындааларын сэгэтэн көрбүттэр, холобура, сурунаал бастакы нүөмэригэр тахсыбыт Б.Нь. Лөгүөнтэйэп, Ө.С.Байаарап уонна А.У.Соппуруонап аан тыллара киирбит. Туох санаалаах, этэр-тыынар тыллаах 100 сыл анараа өттүгэр дьоҥҥо-норуокка «Чолбон» сурунаал аан тыла арыллыбыт эбитий? Маны таһынан, түүр омуктар латиницаҕа көһүүлэрин уонна онно сахалар суолталарын туһунан Утум Захаров «1926 сыл: сахалар – Бакуга. Түүрдэри үөрэтиигэ анаммыт маҥнайгы съезд 100 сылыгар» ыстатыйата эмиэ биир үйэ анараа өттүгэр эргитэр.
Сурунаал иккис нүөмэригэр Аҕа дойдунгу көмүскээччилэр күнүн чэрчитинэн 51 күн анал байыаннай дьайыыга инники кирбиитигэр, өлүү уонна тыыннаах хаалыы ытылҕаныгар сылдьыбыт саха байыаһа Лоокуут «Инники кирбиигэ» ахтыы уочарката; сэрии тыйыс кырдьыга уонна Гиппократ андаҕара алтыһыыларын туһунан Н.Д. Неустроев аатынан эдэр суруйааччылар бириэмийэлэрин лауреата Сардаана «Медбрат» кэпсээнэ; анал байыаннай дьайыыга сахалар кыттыыларын, сэрии уонна ытык иэс, өлүү уонна кэлэр кэскил туһунан драматург Сиэн Өкөр «Угледар буора» пьесата киирдилэр.
Быйыл дойдубут үрдүнэн норуоттар сомоҕоһууларын сыла биллэриллибитэ, ол чэрчитинэн бырааттыы норуоттар суруйааччыларын айымньылара киирдилэр, холобур, уоруйах оҕо мүччүргэннээх сырыытын туһунан удмурт суруйааччыта Елена Сараматова «Сгущенка уоруйаҕа» кэпсээнэ Лилия Иванова тылбааһыгар; оҕо дьиэтиттэн тоҕо күрүүрүй? Ол туһунан башкир суруйааччыта Айгиз Баймухаметов «Көтөр буолан эргиллиэм» сэһэнигэр «Биир ыал трагедията...» ааҕааччыларбыт санаалара киирдилэр.
Маны таһынан, кырачаан ааҕааччыларга аналлаах «Оҕоҕун кытта аах» рубрикаҕа Николай Якутскай тылбааһыгар «Дьээбэлээх Педро» диэн испанныы остуоруйата бэчээттэннэ.
«Чолбон» сурунаал иккис нүөмэрин кылгастык быһа тардан сырдаттахха итинник, онтон да араас элбэх айымньы, ыстатыйа киирбитин сурунаалы ааҕан билиҥ!