Быйыл дьон биһирээн ааҕар «Чолбон» сурунаала 100 сыллаах үбүлүөйүн бэлиэтиир. 1926 сыллаахха сэтинньи 2 күнүгэр Саха АССР обкомун уурааҕынан Саха АССР үөрэҕириигэ уонна доруобуйа харыстабылыгар наркоматын политпрос салаата «Саха омук» культурнай-сырдатар уопсастыбаны кытта «Чолбон» сурунаалы төрүттээбиттэрэ. «Чолбон» бастакы эрэдээктэринэн саха литературатын төрүттээччилэртэн биирдэстэрэ, саха маҥнайгы драматурга, бэйиэт, суруйааччы Алампа Соппуруонап буолар.
Биир үйэ тухары саха ааҕааччытыгар «Чолбон» сурунаал суолдьут сулус, «сир түннүгэ» буолбута саарбаҕа суох, оттон саха литературатын сайдыытыгар «Чолбон» - тулхадыйбат тулааһын, төһүү күүс.
«Чолбон» сурунаал 2026 сыл бастакы нүөмэрин сырдатар буоллахха, саха омук нация суолун төрдүгэр үктэниитигэр «Чолбон» сурунаал туох суолталааҕын туһунан бас эрэдээктэр Гаврил Андросов ««Чолбон» иккис үйэ модьоҕотугар үктэннэ» ыстатыйатынан саҕаланар. Сурунаалга Суоһааны «Сэттэ номох» кэпсээнэ, Ульяна Захарова тыа дьиэ кэргэнин олоҕо таас дьиэттэн ыһылла сыспытын туһунан «Таас дьиэ» кэпсээнэ, аһыы аһы амсайарын туохтааҕар да ордорор Сахаар Саабыны көнө суолга Таҥха кэмэ хайдах туруорбутун туһунан Ангелина Васильева ««Өлөн» баран тиллии эбэтэр сүллүүкүн тириитин кэтэ сылдьыбыт киһи» кэпсээнэ, Михаил Жирков «Кутуунньа» кэпсээнигэр Аҕа дойду Улуу сэриитин ыар аһыыта, Норуот поэта Саргы Куо хаһан да уостубат күн-күбэй ийэҕэ таптал туһунан «Ийэм дьикти кэһиитэ – кыһыл дьаабылыка» поэмата, аатырбыт артыыспыт Герасим Васильев олоҕун остуоруйатын кылгас кэрчиктэрин Утум Захаров «Эриирдээх-мускуурдаах олохтон – ат уорҕатыгар» ыстатыйатыгар сырдатта, онтон да атын дьон болҕомтотун тардар, ааҕааччыны умсугутар айымньылар, ыстатыйалар киирдилэр.
Национальнай бибилэтиэкэ пуондатыгар «Чолбон» сурунаал урукку нүөмэрдэрэ кичэллээхтик хараллан сыталлар. Аныгы үйэ ирдэбилинэн, 1928 сылтан билиҥҥи кэмҥэ диэри тахсыбыт нүөмэрдэр сыыппараҕа көһөрүллэн, электроннай бибилэтиэкэҕэ туспа тематическай кэллиэксийэҕэ таҥыллан, тэйиччиттэн ааҕарга табыгастаахтар.
