СӨ Национальнай бибилэтиэкэтин Историческай саалатыгар «Чурапчы оройуонун, улууһун Бочуоттаах гражданнара» диэн саҥа кинигэ сүрэхтэннэ.
Тэрээһиҥҥэ улуус баһылыга Степан Саргыдаев, баһылыгы социальнай боппуруостарга солбуйааччы Мария Кронникова, улуус дьокутааттарын Сэбиэтин бэрэссэдээтэлэ Яков Оконешников, Ил Түмэн дьокутаата Дмитрий Поисеев, “Көмүөл” кинигэ кыһатын дириэктэрэ Борис Павлов, куоракка олорор биир дойдулаахтар, ытык кырдьаҕастар, билим, литэрэтиирэ, ускуустуба уонна уопсастыбаннас биллэр-көстөр бэрэстэбиитэллэрэ, үлэһиттэрэ кытыннылар.
Чурапчы улууһун баһылыга Степан Саргыдаев бу кинигэ тахсыытыгар үлэлэспит дьоҥҥо, кинигэ кыһатыгар махталын тылларын эттэ.
“Чурапчылар хантан даҕаны хостонор баайбыт-дуолбут суох, ол эрээри, кырдьык даҕаны, дьоммутунан баайбыт. Сахабыт сирин, Арассыыйа сайдыытыгар үлэлэспит, күн бүгүҥҥэ диэри үлэлии-хамсыы сылдьар үтүө-мааны дьоммутун киэн туттабыт. Саҥа сыл саҕаланыытыгар бэрт бэлэх буолла, бу кинигэҕэ киирбит хас биирдии киһи Чурапчы улууһун устуоруйатын кэрэһитэ буолар”, - диэн эттэ.
1967 сыл ахсынньытыгар «Чурапчы оройуонун Бочуоттаах гражданина» диэн үрдүк аат аан бастаан икки киһиэхэ - Социалистическай Үлэ Дьоруойугар Роман Иннокентьевич Константиновка уонна РСФСР уонна САССР оскуолаларын үтүөлээх учууталыгар, Аҕа дойду сэриитин кыттыылааҕар Степан Кузьмич Макаровка иҥэриллибит. Онтон ыла күн бүгүн Чурапчы улууһун бочуоттаах олохтооҕун ытык аатын 298 киһи сүгэр.
Кинигэ ааптара ССРС эргиэнин, Арассыыйа потребкооперациятын туйгуна, «Арассыыйа потребительскай кооперациятын сайдыытыгар кылаатын иһин» уордьан кавалера, СӨ успуордун Бочуоттаах бэтэрээнэ, Арассыыйа суруналыыстарын сойууһун чилиэнэ, Чурапчы улууһун Бочуоттаах гражданина Герасим Степанович Платонов буолар. 298 киэн туттар дьон туһунан кэпсиир матырыйааллары улуус дьокутааттарын Сэбиэтин бэрэссэдээтэлэ Яков Оконешников уонна Надежда Борисова түмэн, хомуйан бэчээккэ бэлэмнээбиттэр. Кинигэ Чурапчы улууһун дьаһалтатын үбүлээһининэн «Көмүөл» кинигэ кыһатыгар 350 ахсаанынан бэчээттэммит.
Кинигэ Чурапчы улууһун, оройуонун Бочуоттаах гражданнарын үлэлэрин, оройуон, улуус сайдыытыгар киллэрбит кылааттарын, үлэлээн ааспыт кэмнэрин сиһилии сырдатар. Ааҕааччы киэн араҥатыгар ананар.
