Саха норуодунай бэйиэтэ, тылбаасчыт, публицист, оҕо суруйааччыта, Саха сирин суруйааччыларын түмсүүтүн бэрэссэдээтэлинэн өр кэмҥэ үлэлээбит Иван Васильевич Мигалкин сырдык аатын үйэтитэр «Бар дьоммор истиҥ тапталынан» диэн кинигэ сүрэхтэниитэ буолан ааста.
Бу кинигэҕэ бэйиэт төрөппүттэрин туһунан ахтыыта, чугас дьонугар анаабыт хоһоонноро уонна кини туһунан аймахтарын, доҕотторун, үөлээннээхтэрин, суруйааччылар истиҥ ахтыылара, 70 сааһыгар аналлаах тэрээһиннэри сырдаппыт юнкордар, суруналыыстар бэчээккэ тахсыбыт матырыйааллара түмүллэн киирдилэр.
Бу күн бэйиэт сырдык аатын ааттаан, кини үтүө өйдөбүлүгэр сүгүрүйэн, ааттаах-суоллаах суруйааччылар, суруналыыстар, бииргэ үлэлээн ааспыт үөлээннээхтэрэ, доҕотторо, аймах-билэ дьоно, айар үлэтин сүгүрүйээччилэрэ муһуннулар. Тэрээһини «Саха сирин суруйааччылара» ассоциация бэрэссэдээтэлэ, М.К. Аммосов аатынан ХИФУ суруналыыстыкаҕа хаапыдыратын сэбиэдиссэйэ, тыл билимин хандьыдаата Олег Сидоров иилээн-саҕалаан ыытта.
«Иван Мигалкин курдук саха дьонугар-сэргэтигэр, чуолаан тыа дьонугар чугас суруйааччы тарбахха баттанар буолуохтаах. Кини Саха сирин улуустарын хотунан-соҕуруунан бүтүннүү сылдьыбыт суруйааччы буолар, ханна да тиийдэр, оҕолору кытта кэпсэтэр, бэйэтин тула түмэ тардар ураты суруйааччы этэ», - диэн тылларынан ахтыы киэһэтин арыйда.
Уус Алдан улууһун баһылыга Василий Алексеев саҥа кинигэни «Биир дойдулаахпыт аатын үйэтитэргэ улахан кылаат буолар кинигэ» диэн сыанабылын быста. «Уус алданнар күөн туттар киһибит 2029 сылга 75 сааһын дорҕоонноохтук бэлиэтиэхпит, ону ситиһэргэ анал хамыыһыйа быйылгыттан үлэтин саҕалыа», - диэн кэлбит дьоҥҥо мэктиэ тылын эттэ.
«Айар» национальнай кинигэ кыһатын салайааччыта Август Егоров 30 тахса сыл бииргэ үлэлээбит үөлээннээҕин олус көнө, эйэҕэс майгылаах, олус үөрүнньэҥ, киэҥ билиилээх, мэлдьи кэрэ кэпсээн кэһиилээх, киэҥ ыырдаах айанньыт этэ диэн ахтан-санаан ааста.
«Улуу дьон олорон ааспыт олоҕун туоһулуур өйдөбүнньүктэринэн пааматынньык уонна кинигэ буолар, маныаха кинигэ – ис хоһоон. Норуот бэйиэтэ, суруйааччыта Иван Васильевич Мигалкин туһунан үйэлэргэ хаалар үтүө өйдөбүнньүгү оҥорон таһаардыбыт, доҕорбут иннигэр ытык иэспитин толордубут”, - диэн санаатын түмүктээтэ.
Саха норуодунай бэйиэтэ, Саха сирин суруйааччыларын сойууһун бэрэссэдээтэлэ Наталья Харлампьева кэлбит дьоҥҥо, биир дойдулаахтарыгар, ааҕааччыларыгар махтал тылларын биллэрэн туран, литература эйгэтигэр маҥнайгы хардыыларын бииргэ саҕалаабыт үөлээннээҕин Иван Васильевич туһунан олус истиҥник ахтан-санаан ааста. «Кини үлэтигэр-хамнаһыгар салайтарар санаата - литература сайдыыта, норуотун инники кэскилэ этэ», - диэтэ.
Уус Алдан улууһун II Лөгөй нэһилиэгин баһылыга Петр Бурнашев: «Тумус туттар, ытыктыыр киһибит биһиэхэ, биир дойдулаахтарыгар, сүдү бэлэҕэ – «Өрөгөй ырыата» буолар, бу ырыаны биһиги нэһилиэкпит бэлиэ түгэннэригэр сүһүөхпүтүгэр туран, үөрэ-долгуйа толоробут», - диэн эттэ уонна нэһилиэк бибилэтиэкэтигэр Иван Мигалкин аатын иҥэриэхпит диэн кэлбит дьоҥҥо тыл көтөхтө.
Тэрээһини Иван Мигалкин хоһооннорунан Дьокуускай куорат 82 нүөмэрдээх «Мичээр» оҕо уһуйаанын иитиллээччилэрэ, Уус Алдан улууһун М.Н. Готовцев аатынан Танда орто оскуолатын үөрэнээччилэрэ, «Кэскил» медиа-оскуола юнкордара, «Кырсаада» литературнай түмсүү кыттыылаахтара киэргэттилэр, маны таһынан, кэлбит ыалдьыттар суруйааччы хоһоонноругар суруллубут ырыалары толордулар.
СӨ Национальнай бибилэтиэкэтин кыраайы үөрэтэр национальнай пуонда салаатын үлэһиттэрэ Иван Мигалкин айар үлэтигэр аналлаах быыстапка туруордулар.
