Тохсунньу 23 күнүгэр 15.00 чаастан СӨ Национальнай бибилэтиэкэтин Историческай саалатыгар норуот поэта, тылбаасчыт, публицист, оҕо суруйааччыта Иван Васильевич Мигалкин сырдык аатын үйэтитэр «Бар дьоммор истиҥ тапталынан» кинигэ сүрэхтэниитигэр ыҥырабыт.
Иван Мигалкин 1954 сыллаахха Уус Алдан улууһун Хоро нэһилиэгэр учуутал дьиэ кэргэҥҥэ төрөөбүтэ. Бүлүү педучилищетын, Горькай аатынан Литература үнүстүүтүгэр поэзия салаатын бүтэрбитэ.
«Ньургуһуннаах сурук» бастакы кинигэтэ 1976 сыллаахха тахсыбыта. Кэргэнэ Зоя Васильевнаны кытта суруйааччы В. А. Протодьяконов — Кулантай аатынан Литература түмэлин тэрийбиттэрэ.
Нуучча уонна омук литературатын айымньыларын сахалыы тылбаастаабыта. 40-тан тахса кинигэни суруйан бэчээттэппитэ.
«Бар дьоммор истиҥ тапталынан» кинигэҕэ саха норуодунай бэйиэтэ Иван Мигалкин төрөппүттэрин туһунан тус бэйэтин ахтыыта, чугас дьонугар анаабыт хоһоонноро уонна кини туһунан аймахтарын, бу олоххо алтыһан ааспыт доҕотторун, үөлээннээхтэрин, суруйааччылар истиҥ ахтыылара түмүллэн киирдилэр. Ааҕааччы киэҥ араҥатыгар ананар. Кинигэ сүрэхтэниитигэр көхтөөх кыттыыны ыларгытыгар ыҥырабыт.
