Быйыл 2025 сыл норуот аатырбыт тойуксута, түһүлгэлээх үҥкүүһүт Сергей Афанасьевич Зверев-Кыыл уола төрөөбүтэ 125 сылын көрсө Бырабыыталыстабаннай хамыыһыйа тэриллэн Сунтаар улууһунан эрэ муҥурдаммакка, өрөспүүбүлүкэ үрдүнэн саха норуотун дэгиттэр талааннаах ытык киһитин албан аатын үйэтитиигэ былааннаах үлэ ыытылынна.
Ол чэрчитинэн, ахсынньы 19 күнүгэр, СӨ Национальнай бибилэтиэкэтин устуоруйа саалатыгар «Сэргэй Зверев-Кыыл Уола үөскээбит эйгэтэ уонна айымньылаах алтыһыыта» диэн саҥа кинигэни сүрэхтээтилэр.
Кинигэни тыл билимин доктора, ХИФУ профессора Василий Илларионов уонна ХИФУ доцена Туйаара Илларионова хомуйан оҥордулар. Кинигэ С. Зверев-Кыыл Уола айымньылаах үлэтин арыйар түөрт түһүмэхтэн турар, В.В. Илларионов араас кэмҥэ бэйэтэ суруйбут уонна кини көрдөһүүтүнэн суруллубут ахтыылар тиһиллэн киирбиттэр.
Бун күн олоҥхону, норуот ырыаһыта Сергей Зверев-Кыыл Уола олоҕун, айар үлэтин интэриэһиргээчилэр, тыл үөрэхтээхтэрэ, наука үлэһиттэрэ, суруйааччылар, устудьуоннар төгүрүк остуол тула атах тэпсэн олорон сэһэргэһэ муһуннулар.
Кинигэ сүрэхтэниитин СӨ култуура уонна духуобунай сайдыы миниистирин бастакы солбуйааччыта Мария Турантаева Сергей Зверев-Кыыл Уола үбүлүөйдээх сылын көрсө, өрөспүүбүлүкэ үрдүнэн эрэ буолбакка, дойдубут таһымыгар тахсан, ыытыллыбыт кэккэ тэрээһиннэр тустарынан кэпсээтэ. «Сергей Зверев-Кыыл Уола курдук улуу убайдарбыт этэн-тыынан, айан-тутан хаалларбыт тойуктара, олоҥхолоро аан дойду таһымыгар саха аатын ааттата сылдьара олус кэрэхсэбиллээх. Василий Васильевич Илларионов олоҥхоһуттарбыт ааттарын тилиннэрбит, сурукка тиһэн, кинигэ оҥорон таһаарбыт саха норуотугар сүҥкэн улахан кылааттаах», - диэн санаатын үллэһиннэ.
Саха норуодунай суруйааччыта Наталья Михалева-Сайа «Василий Илларионов чинчийэр үлэтин аан маҥнай саҕалыырын саҕана техническэй саҥардыыны олоххо киллэрбит, аудиомагнитофон ылан олоҥхоһуттары устууну аан маҥнай саҕалаабыт киһи буолар», - диэн кэрэхсэбиллээхтик кэпсээн, этэн-тыынан ааста. Кини «Остуолга олорон суруйан-бичийэн наука киһитэ буолуохха эмиэ сөп, ол эрэн Василий Васильевич мэлдьи дьон ортотугар сылдьан, куйааһы куйаас диэбэккэ ыһыахтары кэрийэн, олоҥхо, оһуохай истэн, дьүүллээн, ону ырытан, эт киһи элэйэр, сыа киһи сылайар үлэтин ыыппыт киһи буолар», - диэн кинигэ ааптарын үлэтин сыаналаата. Наталья Владимировна санаатын Сергей Зверев-Кыыл Уола оһуохай туһунан эппит тылларынан олус кэрэхсэбиллээхтик түмүктээтэ: «Сергей Зверев оһуохай туһунан “Куйаар далай оһуохай” диэн этэн турардаах, ол аата куйаар курдук үрдүк, далай курдук дириҥ – оһуохай, онон куйаар курдук дириҥ, далай киһибит олоҕун өйдүүрбүтүгэр өссө биир улахан өҥө оҥорбутугар Василий Васильевичка махтанабыт», - диэн эттэ.
Бу тэрээһиҥҥэ кэлбит дьон Сергей Зверев-Кыыл Уола ырыаҕа, үҥкүүгэ, оһуохайга, олоҥхоҕо - сахатын норуотун култууратыгар киллэрбит кылаатын бүтүн саха норуота барыта туттан олорор, оттон Василий Васильевич Илларионов олоҥхону, фольклору наука таһымыгар таһаарбыт саха чинчийээччилэригэр тулхадыйбат тулааһыммыт буолар диэн үгүс үтүө тыллары эттилэр.
СӨ Национальнай бибилэтиэкэтин кыраайы үөрэтэр салаата Василий Илларионов чинчийэр үлэтигэр туһааннаах кинигэ быыстапкатын бэлэмнээтэ.