Ахсынньы 8 күнүгэр күнүс 15 чаастан СӨ Национальнай библиотекатын историческай саалатыгар Николай Иванович Егоров - Баайаҕыын "Саха иһитэ" диэн саҥа кинигэтин сүрэхтиэҕэ. Манна бу сүҥкэн үлэ ис хоһоонун тула атах тэпсэн олорон, ирэ-хоро сэһэргэһиэхпит. Этнографтар, кыраайы үөрэтээччилэр, туой иһити оҥорор маастардар, СӨ күөсчүттэрин түмсүүтүн чилиэннэрэ кыттыыны ылыахтара.
Николай Иванович Егоров-Баайааҕын — Таатта улууһун Баайаҕа ытык олохтооҕо, бас-көс киһитэ, саха саарына Борис Федорович Неустроев- Мандар Уус доҕоро, уҥа илиитэ,биллиилээх фольклорист, кыраайы үөрэтээччи.
Кинигэ матырыйаалын автор 2012 сылтан хомуйан оҥорбут. Манна саха иһитин чинчийиитин туһунан матырыйаалы сэргэ автор "Айыы кыһата" оскуола дириэктэрэ Лидия Петровна Шамаева салайааччылаах учууталлары уонна үөрэнээччилэри кытта бииргэ Урал бэтэрээ өттүгэр баар уруулуу омуктарбыт олорор өрөспүүбүлүкэлэригэр, уобаластарыгар экспедицияҕа сылдьыбытын түмүгэ эмиэ киирдэ. Аныгы иһит салаатыгар Ольга Григорьева -Туналы Урсун ыстатыйата, «Көмүлүөк" хампаанньа, "Туой Арт" мастарыскыай оҥоһуктарын хаартыската таҕыста.
Кинигэ бэчээттэнэн тахсыытыгар "Көмүлүөк" хампаанньа күүс-көмө буолла.
Тэрээһини "Көмүлүөк" хампаанньа уонна СӨ Национальнай бибилэтиэкэтэ иилээн-саҕалаан ыытыахтара.
Буолар сирэ: Дьокуускай к, Ленин пр, 40, СӨ Национальнай бибилэтиэкэтин историческай саалата.
"Саха иһитэ" кинигэ аҕыйах ахсаанынан таҕыста. Сүрэхтэнии күн бибилэтиэкэҕэ, онтон атын кэмҥэ "Көмүлүөк" бары маҕаһыыннарыттан уонна онлайн бу сигэнэн киирэн ыйытыаххытын сөп:
