"Саха" НКИХ "Тыый!" чабырҕах күрэҕэр СӨ Национальнай бибилэтиэкэтин кыраайы үөрэтэр салаатын үлэһитэ Ильина Виктория Викторовна кыттар.
Виктория Уус Алдан Суоттутуттан төрүттээх, Мэҥэҕэ "Кыталык", Бүлүүгэ "Айылгы", Дьокуускайга " Күндэл" ансамбылларга ситиһиилээхтик дьарыктаммыта. Мэҥэ Хаҥалас мааны кийиитэ, элбэх оҕо ийэтэ.
Национальнай кыраайы үөрэтэр пуонда олус баай, олортон Виктория интэриэһинэй дьон туһунан кинигэлэри сөбүлээн ааҕар. Аан маҥнай чабырҕаҕы Н. Г. Чернышевскай аатынан Бүлүүтээҕи педагогическай колледжка үөрэнэ сылдьан толорбут, учуутала Евдокия Степановна Сергина буолар.
"Студенныы сылдьан чабырҕахтаан баран, олох аҕыйахта чабырҕахтаабытым, саамай ситиһиилээх толоруу - Италияҕа "Күндэл" үҥкүү ансаамбылынан фестивальга бара сылдьан дьүөгэбинээн Дора Васильевна Пахомовалыын чабырҕахтаабыппыт. "Тыый!" күрэххэ Татьяна Афанасьевна Гоголева кытын диэн ыҥырбытыгар, коллегам Туяра Готовцева өйөөбүтэ, ол курдук сөбүлэспиппин билбэккэ да хаалбытым", - диэн Виктория Викторовна бэлиэтиир.
Күрэх түмүктүүр добун киэһэтэ алтынньы ый 26 күнүгэр киэһэ 19 чаастан "Саха" НКИХ быһа эфиригэр буолар. Быһа эфиргэ, 60 мүнүүтэлээх таймер үлэлиир кэмигэр, 5533 нүөмэргэ НВК пробел 8 смс ыытан далбар хотуммутун өйүөххэ диэн ыҥырабыт!
