Алтынньы 10 күнүгэр бэйиэт, тылбаасчыт Дмитрий Герасимович Дыдаев төрөөбүтэ 90 сылын көрсө «Дорҕоон буоламмын, дуораһыйан иһэн, уостан сүтүмүүм...» кинигэ сүрэхтэниитэ буолан ааста.
Тэрээһини иилээн-саҕаалаан ыытта М.К. Аммосов аатынан Хотугулуу Илиҥҥи Федеральнай университет президена Евгения Михайлова.
Биһирэм киэһэтэ СӨ Национальнай бибилэтиэкэтин киэҥ-сырдык уораҕайыгар саха үгэһинэн ыалдьыттарын алаадьылаах саламаатынынан маанылыы, үөрүүлээх быһыыга-майгыга аһылынна.
Ол курдук маҥнайгы тылы СӨ Национальнай бибилэтиэкэтин салайааччыта Саргылана Максимова куйаар ситиминэн быһа холбонон эҕэрдэлээтэ, Дмитрий Дыдаев 90 сааһын көрсө үс кинигэ электронно тиһиллэн тахсыбытын кэпсээтэ. «Дмитрий Герасимович аан маҥнай үлэтин Одьулуун нэһилиэгин бибилэтиэкэтиттэн саҕалаабыта, онон биһиги коллегабыт 90 сааһын туолар сылын көрсө кини айымньыларын, публицистикатын барытын түмэн, барыта 360 тахсар ахсааннаах биоблиографическай ыйынньык бэлэмнээн таһаарбыппытыттан астынабыт. Бу ыйынньык Дмитрий Дыдаев олоҕун, айар үлэтин үөрэтэр дьоҥҥо туһалаах буолуо диэн эрэнэбит», - диэн түмүктээтэ.
Салҕыы тыл эттэ өрөспүүбүлүкэҕэ биллэр общесвеннай-политическай деятель, суруйааччы биир дойдулааҕа Альбина Поисеева, кини кинигэни таһаарарга туох төрүөт буолбутун, хайдах үлэ барбытын сиһилии кэпсээтэ. «Бу кинигэни таһаарарбытыгар, Дмитрий Дыдаевы кытта тыыннааҕар алтыспыт, кини туһунан өйдөбүлү илдьэ сылдьар дьоҥҥо-сэргэҕэ 100 сылыгар диэри олус уһун кэрчик кэм буолар диэн санааттан сиэттэрэн 100 сааһын күүппэккэ ахтыылары хомуйан, кэлэр кэнчээри ыччат биллин диэн санааннан салайтардыбыт», - диэн санаатын тоһоҕолоото.
Кинигэ маҥнайгы чааһын Саха норуодунай бэйиэтэ, Саха сирин суруйааччыларын сойууһун бэрэссэдээтэлэ Наталья Харлампьева билиһиннэрдэ, бэйиэт айар үлэтигэр болҕомтотун ууран хоһооннорун символикатын ырыппыта, ааҕааччыга быһааран биэрбитэ ордук кэрэхсэбиллээх буолла. “Дмитрий Дыдаев поэзиятыгар саха киһитин өйүгэр-санаатыгар, этэргэ диэри, генетическай кодугар баар өйдөбүллэри хоһуйан суруйар, ол курдук «оҕо төрөөһүнэ», «ыалдьыт» диэн өйдөбүллэр саха киһитигэр улахан суолталаах буолар. Ол эрэн Дыдаев поэзиятыгар кытаанах соҕус, тыйыс тыллардаах хоһооннор эмиэ бааллар, ити, биллэн турар, олоҕун ыарахан кэмнэрин санаан суруллубут хоһооннор. Дмитрий Герасимович айар үлэтин аанньал курдук сырдаппыт, сырдык иччилээбит киһинэн кэргэнэ Татьяна Петровна Слепцова буолар”, - диэн кэпсээтэ Наталья Ивановна. Кини ордук сиһилии Дыдаев тылбааска үлэлэригэр тохтоото. Дагестан норуота киэн туттар, Арассыыйа биир чулуу бэйиэтэ Расул Гамзатов айар үлэтин ытыгылаан туран хоһооннорун сахалыы саҥардыбыт бэйиэт буоларын тоһоҕолоон эттэ.
Кинигэ иккис чааһын суруйааччы, суруналыыс, Саха Өрөспүүбүлүкэтин култууратын үтүөлээх үлэһитэ Евдокия Иринцеева-Огдо билиһиннэрдэ. Кини 70-с сылларга оскуолаҕа үөрэммит оҕолор бары да кэриэтэ Дмитрий Дыдаев хоһооннорун биһирээн ааҕар этибит диэн кэпсиир, кинигэҕэ үлэлэһэ сылдьан бэйиэт уустук олоҕуттан, кини олоҕун бүдүрүтэр, атахтыыр санаалаах дьон баалларыттан хараастар санаалар кинигэҕэ үлэлэһэрбэр баара диэн санаатын үллэһиннэ. Евдокия Иринцеева-Огдо олус умсугутуулаахтык Дмитрий Герасимович уонна Татьяна Петровна суруктарын ис хоһоонун кэпсээн ааста.
Бу күн Дмитрий Дыдаев айар үлэтин, олоҕун тула оҕо сааһын, устудьуон сылларын доҕотторо, биир кэмҥэ үлэлээн-хамсаан, айан-тутан ааспыт үөлээннээхтэрэ, биир дойдулаахтара сэргэх сэһэннээх ахтыы киэһэтин атаардылар.
Дмитрий Дыдаев оҕо сааһын туһунан доҕоро бэрэпиэссэр, экэниэмикэ билимин дуоктара, Саха Өрөспүүбүлүкэтин билимин үтүөлээх деятелэ Иннокентий Поисеев ахтан-санаан ааста. Бииргэ үөрэммит устудьуон кэмин доҕоро, бэрэпиэссэр, тыл үөрэҕин билимин дуоктара, Арассыыйа уонна Саха Өрөспүүбүлүкэтин култууратын үтүөлээх үлэһитэ Иван Алексеев-Хомус Уйбаан кэпсээтэ. Маны таһынан бэйэлэрин санааларын үллэһиннилэр Саха Өрөспүүбүлүкэтин култууратын үтүөлээх үлэһитэ, Саха норуодунай суруйааччыта Василий Егоров-Тумарча, “Ийэ тыл кэскилэ” Өрөспүүбүлүкэтээҕи хамсааһын салайааччыта, гуманитарнай уонна аҕыйах ахсааннаах норуот кыһалҕаларын институтун билим үлэһитэ Вилюяна Никитина, Чурапчы улууһун Одьулуун нэһилиэгин баһылыга, Саха Өрөспүүбүлүкэтин норуотун хаһаайыстыбатын үтүөлээх үлэһитэ Людмила Ефремова, Чурапчы улууһун администрациятын социальнай коммуникациялар отделын начаалынньыга Алена Пермякова.
Биһирэм киэһэтин Дмитрий Дыдаев хоһоонноро ылбаҕай ырыа буолан киэргэттилэр. Бэйиэт таптыыр кыыһыгар суруктарын А.Д.Макарова аатынан Дьокуускайдааҕы култуура уонна ускуустуба кэллиэһин театральнай салаатын 2 курсун устудьуоннара ааҕан иһитиннэрбиттэрэ ордук дьон болҕомтотун тарта. Онтон Одьулуун орто оскуолатын 11 кылааһын үөрэнээччилэрэ биир дойдулаахтарын хоһоонун аахпыттара ордук кэрэхсэбиллээх буолла.
СӨ Национальнай бибилэтиэкэ Медиа киинэ
