СӨ Национальнай бибиэлэтиэкэтин Историческай саалатыгар салайар үлэҕэ үлэлии-хамныы, айа-тута сылдьар, дьоҥҥо-норуокка биллэр, ытыктанар салайааччы Владимир Тихонов олоҕун уонна үлэтин туһунан сырдатар «Киһи киэнэ кэрэмэһэ» ахтыы кинигэтин тула иһирэх кэпсэтии буолан ааста. Биһирэми иилээн-саҕалаан ыытта - кинигэ ааптара, СӨ норуодунай суруйааччыта, бэйиэт, тележурналист Наталья Михалева-Сайа.
Кинигэ ис тутула 8 түһүмэхтэн турар, ол курдук Владимир Иванович ойор-мэник оҕо сааһыттан саҕалаан, устудьуон кэрэ кэмнэрин хабан, аан маҥнайгы үлэтин үктэллэриттэн, Сунтаар улууһун Аҕа баһылыга, өрөспүүбүлүкэбит министиэристибэлэригэр үлэлээбит сылларыттан, билиҥҥи кэмҥэ салайа сылдьар тэрилтэтигэр тиийэ тиһиллэн, саас сааһынан суруллан дьоһуннаах кинигэ тахсыбыт.
Хас түһүмэх ахсын аймах-билэ дьоно, оҕо сааһын, эдэр эрчимнээх сылларын доҕотторо, биир кэмҥэ үлэлээбит, айбыт-туппут дьоно, дьиэ кэргэнэ кини киһи быһыытынан сиэр-майгы маанытын, салайааччы быһыытынан ураты мындыр өйүн мэктиэлиир ахтыылара тиһиллэн киирбит.
«Үчүгэй кинигэ үйэлээх, кэрдиис кэмҥэ кэнчээри ыччака хаалан иһиэ буоллаҕа диэн санааттан бу кинигэбитин таһаардыбыт», - диэн тыллартан Наталья Михалева-Сайа кинигэҕэ ылсан үлэлэспитин туһунан кэпсээнин саҕалаата.
Кинигэ атын ахтыылартан уратыта диэн, суруналыыс идэлээх киһи ылсыбытын быһыытынан, Владимир Тихоновтан бэйэтиттэн интервью ылан, хас биирдии түһүмэҕин ахсын «Кэпсиэ эрэ» диэн рубрикаҕа кинигэ сүрүн дьоруойун ахтыылара киирбит. «Ситиһиилэр хайдах кэлбиттэрин туһунан бэйэтин ис санаатын ааҕар ааҕааччыга кэрэхсэбиллээх буолуо диэн киллэрбитим», - диэн кэпсиир Наталья Владимировна.
Кинигэ ис тутула эрэ буолбакка, тас бараана эмиэ олус кэрэхсэбиллээх буолан тахсыбыта тута харахха быраҕыллар, маныаха эмиэ туспа кэрэ кэпсээн тардылынна, ол курдук Владимир Иванович Сунтаар улууһугар Аҕа баһылыгынан үлэлиир кэмнэригэр ат толору симэҕин сөргүтүүгэ күүстээх үлэ ыыппытын түмүгүн сунтаардар биир кэрэ бэлиэ бэлэхтэринэн ааҕаллар эбит. Бу бэлиэ түгэни үйэтитэн Наталья Михалева- Сайа «Алтан аарык тойуга» диэн киинэ устубутугар кыттыбыт хаартыската кинигэ тас барааныгар лоп бааччы сөп түбэһэн хаалбыта кэрэхсэбиллээх. «Ханнык баҕарар салайааччы остуолугар ууруна сылдьан ааҕар, үөрэх кинигэтэ буолуо диэн эрэнэбин», - диэн түмүктээтэ кинигэ ааптара.
«Киһи киэнэ кэрэмэһэ» кинигэни «Көмүөл» кинигэ кыһатыгар 500 тираһынан бэчээттээн таһаарбыттар. Суруналыыс, «Көмүөл» кинигэ кыһатын салайааччыта Борис Павлов-Кэм санаатын үллэһиннэ: «Сайа кинигэ таһаарытыгар бэйэтэ туспа көрүүлээх киһи, тутула маннык буолар диэн ыйан-кэрдэн, бэйэтэ хас биирдии ымпыгар-чымпыгар тиийэ үлэлэспитэ. Онуоха улахан киһи туппута-хаппыта тута биллэр, ис хоһооннуун, тас көрүҥнүүн үчүгэй кинигэ буолан таҕыста диэн сыаналыыбыт. Бу кинигэ норуокка тииийдин, Владимир Иванович өйө-санаата, үлэтэ-хамнаһа түмүллүбүт кинигэтэ ааҕааччытын буллун диэн таһаарааччылар ааттарыттан алгыспытын тиэрдэбит», - диэн түмүктээтэ.
Ити курдук кинигэ ис тутулун батыһан, кэлбит ыалдьыттар: аҕам саастаах эдьиийдэрэ, устудьуон сылларын доҕотторо, Томтор, Майа орто оскуолаларыгар бииргэ үлэлээбит дьоно-сэргэтэ, биир дойдулаахтара сунтаардар, министиэристибэ үлэһиттэрэ бу күн Владимир Ивановичтыын бииргэ алтыспыт сылларын ахтан-санаан аастылар, кинигэ тула сайаҕас санааларын сайа эттилэр. Бары да мустубут дьон кинигэттэн астынан-дуоһуйан, аатын сөбүлээбиттэрин, умнулла быһыытыйбыт саха тыла Владимир Ивановичка, кырдьык да, уот харахха барсарын, биһирээбиттэрин билиннилэр. Бу боростуой ахтыы кинигэ эрэ буолбакка, эдэр салайааччыларга айымньылаах үлэлэригэр, эдэр төрөппүттэргэ оҕону иитиигэ бэлэм сүбэ-кинигэ, остуол кинигэтэ буолар энциклопедия кэриэтэ кинигэ чочуллан, күн сирин көрбүт эбит диэн сыаналаатылар.
Номнуо бэйэтин ааҕааччытын булбут саҥа кинигэни бибилэтиэкэттэн уларсан ааҕыҥ, сэргээҥ диэн ыҥырабыт.
СӨ Национальнай бибилэтиэкэтин Медиа киинэ
