Алтынньы 10 күнүгэр поэт, тылбаасчыт Дмитрий Герасимович Дыдаев төрөөбүтэ 90 сыла.
Дмитрий Дыдаев бу орто дойдуттан барбыта быданнаатар даҕаны, кини аата саха поэзиятыгар умнуллубат аат. Кини поэт эрэ буолбакка, тылбаасчыт быһыытынан киэҥник биллэр. «Интернационал» ааптара Эжен Потьеттан саҕалаан Михаил Ломоносов, Николай Некрасов, Абай Кунанбаев, Владимир Маяковскай, Демьян Беднай, Расул Гамзатов, Роберт Рождественскай курдук бэйэ-бэйэлэригэр майгыннаспат суруйааччылары сахалыы саҥардыбыта.
Быйыл поэт 90 сааһын көрсө айымньыларын барытын түмэн, хомуйан Национальнай бибилэтиэкэ уонна суруйааччы биир дойдулааҕа, республикаҕа биллэр общесвеннай-политическай деятель Альбина Иннокентьевна Поисеева көҕүлээһиннэринэн «Дорҕоон буоламмын, дуораһыйан иһэн, уостан сүтүмүүм...» диэн икки чаастан турар кинигэ тиһиллэн таҕыста.
Кинигэ бастакы туомугар Дмитрий Дыдаев хоһоонноро, тылбаастара, ыстатыйалара түмүлүннүлэр, иккис туомугар поэт туһунан ахтыылар, анабыллар, кэргэнин Татьяна Петровнаны кытта суруйсуута уонна үөлээннээхтэрин, биир дойдулаахтарын ахтыылара киирдилэр.
Кинигэ биһирэмэ алтынньы 10 күнүгэр Саха Өрөспүүбүлүкэтин Национальнай бибилэтиэкэтин История саалатыгар күнүс 15:00 чаастан ыытыллыаҕа. Тэрээһини иилээн- саҕаалаан ыытыаҕа М.К. Аммосов аатынан Хотугулуу Илиҥҥи Федеральнай университет президена Евгения Михайлова.
Бу күн эһигини күүтэр сэргэх сэһэргэһии, ыллам ырыа, ол курдук Дмитрий Дыдаев оҕо сааһын, устудьуон сылларын доҕотторо, биир кэмҥэ үлэлээн-хамсаан, айан-тутан ааспыт үөлээннээхтэрэ ахтан-санаан ааһыахтара бэйиэт олоҕун суолун, айар үлэтин туһунан. Маны таһынан кинигэ маҥнайгы чааһын туһунан билиһиннэриэҕэ Саха норуодунай бэйиэтэ, Саха сирин суруйааччыларын сойууһун бэрэссэдээтэлэ Наталья Харлампьева, кинигэ иккис чааһын суруйааччы, суруналыыс, Саха Өрөспүүбүлүкэтин култууратын үтүөлээх үлэһитэ Евдокия Иринцеева-Огдо билиһиннэриэ.
Поэт төрөөбүтэ 90 сылыгар анаан Народнай поэт Наталья Харлампьева бэлэмнээбит подкастын истиҥ-сэргээҥ.
